Byin Yesu Ku

image001

Ba akadai ukarang uyiang ka a ngyi Nazaret b’abyin Galili kani, guniyem uyiang u ku nshio a ngyi Meri. Nang aka ndyiad alyiad na a tyag gusiyem uyiang ka a ngyi Isuu ni kakyo u bwo ka. Utug uyiang Agwaza u asi tam atam Ntswa awo a ngyi Jibilung ni ba nka a ta ng’wwag ka tam. Atam Ntswa u ata ng’wo ni, asi cio ka laba u nyio nii, “Baa ng’wan, Meri, ng’wan awo shio ng’wo ku ba Gwaza u sswag anyiug ba sallai ni.”

image002Meri a nfag tankai byad ako ni, asi fag uwun, asi ng’wo tyu kyang ako atam Ntswa u a fa ba nku ni. Atam ntswa u asi ya uswon nyo nii. “Yog fag uwun dag Meri. A shio ngwo b’Agwaza swag konyan. A ni byin Nggwon. A na yi ka Yesu. Una yed nggwon Agwaza, wo sswag bi shi ku salai ni. Una byong tyog sang sisag.”

Meri asi ya nkai kyang ako atam ntswa u a lyiad ni a. Iko gwo si lyib nyo nii, “Kyang ni nyio ni i ndi anyo? N shio ba tyog dag.” Jibilung asi shim ka dyo nyio nii, “A byyo kyang ako kiyed Agwaza ni dag.  Gwo na yed Acio nggwon u. A na yi ka Nggwon Agwaza. “Ka kyo Gwaza aku lab unung ana tam dyo. Ka kyo salai aniad Agwaza ba ncei sswag aka tsswong bai kaku.”

Ngbom a dag, usham alyiad aka Jibilung aku bai ba Meri dyo ni. Asi ya uswon bi bwoi gu dyo ku nyio nii, “Nanyiug awu Alisabatu ana byin Nggwon ba nkwob gu ji. Koyag a Gwaza a nyo ana nyio, i yong awo.”

Meri a nfag anyo ni, tsswo guku si myyo.  A si san tam Agwaza ji mbwag nfyyang nyio nii, “N gyed ahwo Agwaza. Yog kyang ako gwo cad ni i di anyo tuza nka banang gwo ndyyad ni.” Manta akyo atam ntswa u asi bwwog a nkad tuza ka.

A labyyang dag Mari asi darag a nad ba nanyiug guwu Alisabatu b‘abyin Yahuda ka. Alisabatu ata nfag ba laba Meri u ni, Agwaza u asi tyai gu kyang ako shio Meri ni. A sika nng‘wo lyyad ku nyo nii, “A shio ng‘wo ba Agwaza u sswag anyiug ba sallai. Ba anyo bo ka nggwon aka ani byin ni. Yag a n gyed had ayang atyo uli ngu a mbai byyad n?”

Meri asi fag nyinyang bad, asi tang Agwaza didyeb b‘abom nyo nii, “N dyeb Agwaza bi tsswo nku salai. N ngwai gu awo yed atyi san ngu ni. Konyan ana nyio n shio ng‘wwo danian cacad nkyang awo gwo nyio n dyo ni. Alyyad guna a kwog talyen. Na shwwod a kwai abyin dag, da gwô bwung aniad guba dag.” Meri asi swan b‘Alisabatu a bwo dzwad tsad, asî da bwog a nad b‘uli ata swan a tsswong jan byin guji.

image003

Isuu aba nfag nyo Meri awo gwo cad bwo ni a shio b‘ufa ni, nda na si kiyed gu. Asi ka tyu gag ako gwo na nnyio a tyad sisag baku ni. Iko utug uyyang asi liyed. Ba liyed guwu atam ntswa asi tag gu nyio nii, “Isuu, yog fag uwun dag. Kyag Meri a yed abyiug awu. Shio ako gwo shio dyo ni, Nggwon Agwaza kyo. Ka a byin, a yi nggwon ka Yesu nwad gwo ana san aniad ba ba katug nyio bawu.”

Issue aba nshyib ni, tsswo guku si myyo. Asi jyung tam atam ntswa ji. Asi kyag Meri a nad dyo b‘uli guka ata yed abyiug guwu.

Meri mbiyang Isuu asi swan a tsswong byin Nggwon ku. Utug uyyang Augustus, agwam Roman u asi cio yi nyo konyan a bwog a nad b‘ukarang aka a ntyi aciohwob guba ni, ata lyurug gu, a tan kurum abyin ku aza.

image004

Isi yed tilid ko Meri mbiyang Isuu a darag a wod Nazaret u a nad Baitalami. Azâ aku mbyin gbondang aciohwob bawu Agwam Dauda, wo ku byong tyog abyin ku ba gbanggbang u ni.

Cyed ku nyio Nazaret ti nad Baitalami ku bwo nnwam ba didid. Kozan utug Meri asi sswad ba aunjai ka nang Isuu a cong ba titag timfam ka a nsai.

Basi ta ng‘wo Baitalami u nang ukarang ka u ka nhyad ba didid aniad awo nyio nta a  bwog bai b‘uli ni. Ba si cad ulwo kwai b‘ulwo hwad niacan na ba si shio dag. Bi tu uyiang, ka a ndwoi dzwon ni, kakyo ba si shio.  Atyo wo ciang ulwo hwwad nacan kani asi nyio ka ba di bana yau a kwai aza bâ ng‘wo. Nang yin ulwo bu nshio ni dag, Isuu asi bwo ahwod nhywo u a nkworog asi jyi Meri dyo asi ng‘wo a myyo.

image005

Tutug akyo, nang aniad Baitalami ba a shio ba nda, Meri asi byin nggwon ninab guka. Asi gad ka bi *cyang atarag aza a ngad nnwan umwwan nani. Asi myai ka ba kukwon ako a nhwod dzwon ntsiyeb ji nhywo na ni.

image006

Uyid ka, manta ukarang Baitalami ka, aniad cog ayiang asi nshio, ba hwwad aza a ciang usworong dzwon ntsiyeb bana. Iko basi ka ndi ulwo ka u tad u karag u bwwag ba, u sai u ya ayi ba.  Basi di atam ntswa a yong bumi sai akyo. Ba si tadyurug bad. Konyan asi kwog mbwag a nkub uyi guka.

Iko atam ntswa u asi nyo nii ba mba, “Nyi yog fag uwun dag. N bai ba nyin usham alyyad. Konyan a fag ka ana gwai gbarandang. Utswun akai a byin nyin atyi san b‘ukarang akyo aku mbyin agwam Dauda gbanggbang ni. Di gag ako nyi ba ti nfig gu ni. Nyi ba ti di ng‘gwon a gad bi *cyang atarag asi myai ba kukwon ako a hwod nkyang cog nhywo ni.”

image007Badiyong ako *atam ntswa ba didid asi tad a wurug tuza ka a yong aza.  Kakab ba, ba si ng‘wo dyeb Agwaza nyio nii,

“Shi yed shin Agwaza wo sswag bi shi salai ni,
Nda si yed shin aniad swanta abyo gwo tsswong nyinyang ba ni.“

*Atam ntswa ba a ntyag didyeb bawu ni, ba si bwog a nkad tuza ka.

Anio cog ba asi kwog mbwag a sai b‘unung asi bwog a yong a cyang ayyang. Ba ka ya ndi kyang nang sikwi ni a. Baba nshio apyyo ba ni, iko basi nyo nii b‘ayyang ba nyio ni, “Nyi bai dzi nad Urushalima u dzi ti di kyang ako bai nkyang anai ni.“

Iko basi darag a wod dzwon ntsiyeb baji ufa afan ka, basi ghaan a nad  Baitalami u. Ba si ta karag a nad manta uli ka b‘ulwo akyo a ndwoi nkyang cog na ni.

Isuu asi fag ba, asi nyyib unung kanywo ka. Ba si lyib nyo nii, “A byin nggwon ufai aji a? Atam ntswa a ba kwog dzid dyo. A nyio ka kyo u yed Atyo uli dzi wu mbyyang atyi san dzid u, nyo dzi ba ti di a gad ka bi *cyang atarag asi myai ba kukwon.”

Iko Isuu asi cong bamba a nad ndyo ba kukwon ku, ba si ta di Meri mbyyang ng‘gwon ka. Ba si kparag huhwud basi kwog ka ntong. Utson ka u ntad shansaham ni, basi bwog a nad d‘ulwo cog baka. Ba si cin, a tang Agwaza u didyeb ba ndwag ku. Konyan a ba shio basi bwoi gu nkhang anai.

Anyo Yesu a ng‘wo ba swanta akwi. Mari asi cyang nggwon ninab guka, asi byong nkyang ana ba ntsswo.

image008